Автор шығармасында адамның ой санасындағы шығар жолы табылмайтын қараңғы, құпия орманды да меңзейді.
Әлемдік бестселлер осы романды талантты ақын Дәурен Берікқажы қазақшаға тәржімалап, Steppe and World баспа үйі автордың ресми рұқсатымен сүйікті оқырмандарына ұсынып отыр.
Өткен ғасырдың 60шы жылдарындағы Жапонияның саяси, әлеуметтік өмір тынысын және сол заманның рухын, студент Ватанабе санның күнделікті тірлігі, шытырман махаббаты, жалғыздығы, жан дүниесінің арпалысы, еркек пен әйелдің ара қатынасы бәрі бәрін автор Мураками шынайы суреттеу арқылы тамаша баяндайды.
Роман өткір шығарма, бірақ жеңіл оқылады, жалықтырмайды. Оқылады емес тіпті бас алмай жұтып қоясың. Сөйлемдері қысқы да нұсқа, бірақ жеткізетін ойлары айқын және терең. Жалпы өмір мен өлім тақырыбы Мураками шығармаларында әркез терең орын алған. Жапондардың өлімге деген көзқарасы еуропалықтардан мүлде басқа екенін автор анық түсіндіреді. «Ажал – өмірге кереғар дүние емес, оның бір бөлшегі» деген пайымды ұғасыз.
“Норвег орманы” носталжиялық шығарма. Отыз жеті жастағы жігіт ағасы он сегіз жастағы балаң студент кезін, балғын, шытырман махаббат шағын жүрегін езіп, жанын кеміріп отырып аңсайтынын қайтерсің.

Әрине адамзаттың мәңгілік тақырыбы болған махаббат Муракамиде басқалардан бөлекше, жапон адамының көзімен, сезімімен сипатталады. Жан махаббаты, тән махаббаты жәйлі мейлінше ашық көсілгенімен шектен шықпай, дер кезінде аттың басын тартып отыратыны қас талантқа тән. Баянсыз, нәтижесіз, кері жауапсыз махаббаттың сан түрлі шырмауық түйіндерін асықпай тарқатады.
Мураками шынайы, шыншыл қаламгер. Кейіпкерлері де жалған сөйлегенді жақтырмайды, уәдеге берік. Роман тым адами.
Бас кейіпкер үшеу ғана: Білімді, сабырлы Ватанабе, қамкөңіл, жабырқау Наоко, оптимист, өмірге құштар, өзіне сенімді Мидори. Бұлардың сыртында -жұртты өзіне тартып тұратын туабітті мінезі бар Нагасава және бұрынғы музыкант, кәзір Наоконың досы болған Рейко, осы екі көмекші кейіпкер бар. Бар жоғы бес адамның айналасында өрбіген шым шытырық оқиға. Роман шыға сала жапон студенттердің де, еуропа студенттердің де қолтығына қысып жүретін сүйікті кітабына айналған.
Бір ғажабы, қазақша аудармасының кереметтігі сондай, әу баста қазақ тілінде жазылған ба деп қаласыз. “Норувэй но мори”. Оқып шығу керек енді.