Белгілі журналист, мотиватор Мақпал Болаттың назарларыңызға ұсынылып отырған «Тыныс пен дем» атты психологиялық кітабын тың дүние деп бағалауға әбден лайық. Автор өз-өзін бірнеше жыл бойы терең зерттеген. Кітапта сол зерттеуден түйгендерімен бөліседі. «Тыныс пен демнің» ерекшелігі осында. Автордың психологияға емес, даналыққа көбірек жүгінгенін де аңғару оңай. Сонымен қатар, адам – жарық дүниеге келген күннен бастап ақтық демі тоқтағанға дейінгі өмір соқпағындағы қуаныш пен қайғыны, жалпы барлық кезеңдерді, сәттерді, оқиғаларды, қабылдап-босатушы екендігін ұқтырады. Кітаптан адам өз тағдырынан ешқайда қашып құтыла алмайтындығын, түбінде қабылдау арқылы ғана еркіндікке ие болатындығын түсінесің. Автордың айтпағы – адам жан тыныштығына, абсолютті бақытқа тек өмірін, өзін, өзгелерді қабылдау арқылы ғана жетеді.